January 27, 2009

ياللي حابس نفسك في الصفيحه

This is a poem that I wrote today. It has some hidden meanings and subliminal messages.

ياللي حابس نفسك في الصفيحه
خدها يا ابني مني نصيحه
سيبك من الفقري واللي تلاقيه إيحه
اتجوز الصريحه و إبعد عن القبيحه
فهمت ولا لسه ميحه؟
لو مافهمتش ركز معايا يا إبن المليحه
هكلملك الدنيا اللي فاكرانا دبيحه


الكلام ليكي دلوقتي يا ست دنيا
يا قاسيه و عامله نفسك كولونيا
ليه عماله تلطشي في؟
ده أنا ماليش في الشر وباكره الأذية
إتفائلت وقلت وشك حلو علي
كده برضه تغدري بي؟


ولاد الحلال يتعدوا عالصوابع
هم اتنين تلاتة صعب تلاقيلهم رابع
أما ولاد الحرام حتى على بيوتنا فاتوا
صدقت ستي لما قالت: اللي اختشوا ماتوا


على قد ما فيكي خير.. الشر برضه أكتر
الحقد موجود والبغض مولود
والظلم بقى إيه؟ الله أكبر
وانتي قاعده في منتهى البرود
شايفه غابه مليانه قرود بتهاجم أسود
القسوه بتسود والطريق شكله مسدود
بس القلب يعود يعزف نغمه عالعود
تشيل الجمود و تسبح رب الجنود
اللي بيفك قيود واللي هيشيل منك الدود
ده هييجي بالموعود ويبارك الوجود


ياللي حابس نفسك في الصفيحه
اطلع من الصفيحه دي ريحتها كريهه
اديني هزقتلك الدنيا وما فيها
اقف وقول بأعلى صوت ليها
لأ يا نبيهه
لا الصفيحة لي ولا أنا ليها
دي الحكاية مش عايزة بديهه
بس انتي مالكيش فيها
يا أنا يا انتي يا دنيا
و فيها لاخفيها